| (य-व)
य
यारी
जका है भ्रष्टाचारी
बां री पक्की है यारी।
यूनिवर्सिटी
यूनिवर्सिटी
गाड़ी बिना टी.टी.।
र
रंग फीको
जद बै हा मंत्री
तो चालतो खोटो सिक्को
हटतां ई
बां रो रंग पड़ग्यो फीको।
रंगत
बां छोड़ दी अबै
बुरी संगत
पण बना हेरा-फिरी
कोनी आवै रंगत।
राज़
बां री तरक्की रो राज़
दियो कोनी मूल
खाग्या ब्याज़।
राम-रमी
मर्यां पछै
बां री राम-राम आई
के काम आई।
रामी
नाम रामी
बोलै सामी।
राखी
बै राखै देस री राखी
जका मार कोनी सकै माखी।
राड़
बोदी हुगी बाड़
बां री मिटी कोनी राड़।
राष्ट्रीय आय
सै री एक ही राय
ऊपरी आय,
राष्ट्रीय आय।
राणो
छोरै रो नाम राणो
पड़ौसी पडक्यो बी' नै
सिरवाणो।
राणी
जिको कै' वै
घरआली नै राणी
बी' माचै ऊपर बैठ्यै नै ई
मिल जावै रोटी पाणी।
रांद
टींगर एक बिलांद
करै दुनिया भर री रांद
राज़ी खुसी
घरे है सगला राजी-ख़ुसी
छोरां री मा कर ली खुदकसी।
रिपिया
जदस्यूं लोग
रिपिया खावण लागग्या
बज़ार मेंं नोट
नकली आवण लाग्गया।
रीस
बानै आई इत्ती रीस
छाग्या मांचे री ईस।
रूपिया
रूपियै कन्नै रूपियो आवै
गरीब नै देखतांईं
भाज ज्यावै।
रूलेट
बीं रो खराब है पेट
जित्ता जाम्या सगला रूलेट।
रूं
बण छोड़्यौ कोनी
बाप रो रूं
मिरचां मै मिलावै गेरूं।
'रेडीमेड'
छोरी पै'
कपड़ा 'रेडीमेड'
चरावै भेड।
'रैली'
बां रै के ज़रूरी है
दफ़्तर जाणो 'डेली'
जका अटेन्ड करै 'रैली'।
रोवै
बीनै कुण रोवै
जको माणस मा'र
हाथ कोनी धोवै।
रोकै
बीनै कुण रोकै
जको दोस्त बण' र
पीठ मांय छुरो भौंके।
रोला
सहर मांय रोला ही रोला
सगला हुग्या बोला।
ल
ललकारै
बै घरै बैठ्या-बैठ्या
दुसमण नै ट
टैलीफून पर ललकारै
जे है घणो फन्नेखां
तो आजाय घर स्यूं बा' रै।
लको' र
बा है बां' रै
कालजै री कोर
बै बी' नै राखै
सन्दूक मांय लको' र।
लम्बाई
घर मैं आंतां ही लुगाई
आदमी री कम हो ज्यावै लम्बाई।
लाज
बण राखी
घरआलै री लाज
गई पड़ौसी सागै भाज।
लार
कुण जावै बीं रै लार
जको ले जावै
बूढ़ी डोकरी नै भजा'र।
लाइन हाज़िर
बांरी बन्द हुगी गर्र-फर्र
होंवतां ई लाइन हाज़िर।
लायक
छोरो नालायक
पुरस्कार पाणै लायक।
लार-जार
बां भर राखी है पेटी
नोटांस्यूं हला-हला' र
पण मांगणआला फिरै
बां रै लार-लार।
लू
गर्मिया मैं
जद चाली लू
तो छोरा चल्या गया शिमलै
छोड' र पल्लू।
लोग-लुगाई
घर मैं
दो' ई लुग लुगाई
फेर भी लड़ाई।
व
वर
छपतां ईं
अख़बार मैं खबर
छोरी नै मिलग्यो वर।
वाद-विवाद
बै भी करै वाद-विवाद
जका नै रै वै कोनी
ख़ायैड़ौ याद।
विश्व सुन्दरी
सिकल है इसी
जिसी हुवै ऊंदरी
अर अपणै आप नै
बतावै विश्वसुन्दरी।
विश्व विख्यात
बै है विश्व विख्यात
घरआला लेवै कोनी तात।
विज्ञापन
देखो! बांरो पागलपन
करै व्यापार
अर देवै कोनी विज्ञापन।
वेद-वेदांग
बो जाणे वेद-वेदांग
फिरै घर-घर हांडतो
कर'र ढीली लांग।
वोलटेज
बिजली मैं भी
रैह्यो कोनी दम
बीं री भी वोलटेज
हुगी कम।
|
ए ऐ ओ औ अं अ:
