आपाणो राजस्थान

जबान रो धणी

पोकरयण ठाकर देवसिंघ रे अर जोधपुर राजाजी बिजैसिंघजी रे रात दिन खैंचा ताण चालती। विजैसिंघजी एक दिन देवीसिंहनी ने किले में बुलाया। किले रा दरवाजा बंद कर देवीसिंघजी रो चूक कराय दीध। उणा ंरा दो बेटा सकलसिंघ अर स्यागसिंघ जी ही मारवा ने राजाजी आदमी भेजिया। बिलाड़ा कनै यां री एटक भेटक व्हीं। दोनूं कानी सूं गोलियां चाली। सबलसिंघजी रा माथा में गोली लागी। गोली लागतां ही नीचे पड़िया।
भाई ने घायल व्हियो आंगण पड़ियो देख स्यामसिंघजी दौड़ भाई रो माथो हाथ में झेलियो। लोहियां सूं भीजियोड़ी पलकां ने उधाड़ता सबलसिंघ जी धीरे सूं बोलिया,
"भाई, पाली ला।"
स्यामसिंघ जी दौड़ लौटा में पाणी ले आया।
"हाथ में ले पाणी।" स्यामसिंघझी जाणियो मरती वेलां म्हनें पाणी झेलाय रिया है, आप रो अरब बाप रो बदलो सत्रु सूं लेवणै रौ। वां हथेली में पाणी झेलियो।
कांई प्रण करुं बोलो।
"प्रण ले के जोधपुर रा राज में ऊभो रे पाणी नीं पीऊं।"
दुख अर गलानी सूं स्यामसिंघ रो मूंडो पीलो पड़ गियो,
"आप म्हनै अतरो ओछो समझो ? आप ने वैम है के पोकरण रो ठिकाणो आप रा बेटा ने कोनी भोगण दूंला, हूँ ले लूंगा ? इण सारू आप म्हनें एड़ा सौन देवाय रिया हो। म्हूं अस्यो नीच नीं, खैर ओ पाणी झेलूं के जोधपुर रा राज में ऊभो रे पाणी तक नी पीऊं।"
सबलसिंघ रो सांस छूट गियो, दाग दे स्यासिंघजी उण ही वखत रवाना व्हे गिया। जोधपुर री कांकड़ में चालियो जितरे पाणी नीं पीधो। भरतपुर जाय वठा राजाट रावा जवाहरमलजी री चाकरी झलेी। काम चोखा चोखा कीधा जो घोड़ा पांच सौ वां रा आप रा व्हे गिया अर आछो ठाट बाट जम गियो।
जोधपुर राजाजी विजैसिंघजी रे पासवान जाटणी गुलाबराय। गुलाबराय कैवे जो राजाजी करे, गुलाबराय रा नाम सूं जोधपुर में पत्थर तिरै। जोधपुर रो नामी तलाब गुलाब सागर उण रो बणयोड़ो है। कनै ही बच्चो नाम रो तलाव उम रो बच्चो मर गियो जिण नाम पे बणायो। गुलाबराय भरतपुर राज री रैण वाली है। एक र राजाजी मुहीम सूं पाछा भरतपुर रा राज में व्हेयर आय रिया हा। इण जाटणी ने निजर पड़ी, लारे ले आया।
गुलाबराय ने राजाजी रो अर मारवाड़ रा राज रो जोम अर घमंड व्हेणो ही ज हो। भरतपुर रा मिनखां ने अर वठा रा राजा ने आप रो ओ दिन बतावणे री उण रा मन में घणी। आघर आप रो गरब बतावण री तरकीब वीं काढ़ ही दीधी।
एक दिन गुलबराय जाय राजाजी ने अरज कीधी
"जातरा जाणे री मन में घणी सो आ साध म्हारी पूरी करावो।"
थोड़ी देर तो राजाजी आं दिनां में जातरा री अबखायां बताई पण गुलाबराय री वात ने टालणौ दौरो हो। जातरा जाणे रो बंदोवस्त कराय दीधो।
गुलाबराय दाव लगायो, "भरतपुर रे गैले व्हेता जावां, जलम भोम रा दरसण व्हे जावेला।"
राजाजी उण गैले व्हे जाणे री इजाजत देय दीधी।

चौगणो मगैज बतावती रथ ने सिणगार, टण टण टोकरिया बजाती भरतपुर रा बाजार में गुलाबराय निकली, राजाजी ने बराबरिया ज्यूं मिलणो कैवायो, जात वालां ने आसीस कैवाई। अस्या फितूरा कीदा के ुण रा परवार रा, जाण पिछाण रा बल गिया। राजा जवाहरमल जी ने ही घमी नागुवार गुजारी। जाट सिरदारां आप री तोहीन समझी।

जवाहरमलजी कहियो, "स्यामसिंघजी, बाप रो अर भाई रो बदलो क्यूंक तो आज ले लो। आधी रात गुलाबराय रा डेरा साथे हमलो बोल दो अर इण रांड ने जीवती पकड़ म्हारे कने ले आवजो।"
सारा हमला री रूप रेखा त्यार व्हेगी, हुकम पक्का लाग गिया. स्यामसिंघजी हां हां करता रहिया। सल्ला देता रिया। पण वां रा म में एक मोटी पसोपस।
"सांची वात है विजैसिंघजी म्हारा बाप ने बेकसूर धोका सूं मारिया, म्हारा भाई ने मराया, आज म्हूं वां ने मिल जावूं तो म्हनें वो हत्यारो कदै ही नीं छोड़े, पण वां री लुगाई री बेइज्जती ? भले ही घर में घालियोड़ी है, है तो जोधाणा नाथ री लुगाई। ये उण री बेइज्जती करेला। म्हां राठौड़ लोगां ने मूंडो कठे बतावालां ? दुसमणी है तो मरदां सूं। आपस में लड़ां, कटां, मरां पण अस्तरी री इज्जत पे हाथ घाले अर म्हूं भेलो रेवू ? धिक्कार ! चाहे जो हो वात कोनी व्हे सके। लुगाई री इज्जत देस री इज्जत है, जात री इज्जत है। म्हूं लाख मनां करुं तो ही जवारमल जी तो मानण वाला है नीं। गुलाबराय री इज्जत गी तो मारवाड़ री गी, राठौड़ां री गी। णि री इज्जत राखणे रो तो म्हारो फरज है धरम है। चाहे जो व्हो गुलाबराय री इज्जत खराब नीं व्हेवा देणी।"
स्यामसिंघजी आप रे पांच सौ घोड़ा सवारां ने त्यार रेणे रो हुकम देय, जाट रो सो पैंटो माथे बांध ऊंची ऊंटी गोड़ां सूधी धोवती बांध, हाथ में लाठी ले, घढ़ी रात गियां, गुलाबराय रे डेरे गियाष साथ वाला में ओलख पिछाण रा घणां ही हा।
जाय ने कहियो, "बेटि रा बापां, क्यूं इज्जत देण ने अठे बैठियां हो धड़ीक में थां ने खबर है कांई व्हेण वालो है ?"
खलभलो मच गियो।
गुलाबराय घबराई "अबै कांई करूं।"
स्यामसिंघजी कहियो, "करणो कराणो कांई है, अठा सूं सीधावो, जैपुर री कांकड़ मे जाय थमो, जते पाछा फिर झांकज्यो ही मत। म्हारा घोड़ां, सवारां ने ले म्हूं मराग रोक ऊभोव्हे जावूलां, जीवूं जतरे थो थां ने भीलवा दूं नीं। मरिया पछै री कैवुं नी।"
गुलाबराय तो रथ में ताता नागौरी बलदां री जोड़ी जुताय भागी। लारे आदमी हा जोई घमा खरा तो जातरा जाणे जोग बूढा ठाढा ही ज हा, व्यीया रवाना। लारे झांकती जावे ने बहैलियां ने भगाती जावे। आधी रात रा भरतपुर री फौज हमलो करे तो देखे तो डेरो तो खाली, जवाहर मलजी ने खबर मिली हुकम कीधो,
"लारे रा लारे जाओ, रांड ने पकड़ लाओ।"
गैला में स्यामसिंघजी आप रा पांच सौ सवार लीधां ऊभा। गैलो रोक आडा उभा रे गिया। तरवारां तुल ही गी, सेंठो झगड़ा व्हीयो। स्यामसिंघजी घावां सूं भर गिया, लोहियां सूं झगाबोल व्हे गिया। भरतपुर सूं जैपर री कांकड़ पच्चीस कोस तो दूर जी है। गुलाबराय जैपुर री कांकड़ में जाय रथ रा बहैलिया खोलिया. साध वाला आदमी स्यामसिंघजी ने उठाय गुलाबराय कनै ले आया। स्यामसिंघजी रे पाटा पीड़ कराया। गुलाबराय इण असान रा बोझ सूं दबगी, स्यामसिंघजी रा पग पकड़ लीधा, "जां राजाजी, आप रा बाप ने अर भाई ने चूक कराया उणां री लुगाई रे वास्ते आप रो यो बलिदान। चालो जोधपुर चालो, मन चाहियो पट्टो आप ले। आप केवो जो जो गांव दिरावूं आप ने।"
गुलाबराय री आंखियां में सूं घर घर आंसूं झर रिया।
स्यामसिंघजी बोलियो "पट्टो लेण ने म्हैं यो काम नीं कीधो म्हें तो म्हारो रामधरम निभायो है।"
"स्यामसिंघजी मान जावो, इणवखत म्हारो जोर है, कैवो तो आधीई मारवाड़ रो राज देवाय दूं, चालो जोधपुर। गुलाबराय घणो ही कियो।
"मारवाड़ रा राज में ऊभो रे पाणी पीणे री म्हूं सौगन खाय चूक्यो हूँ, वठे तो नीं आवूं।"
स्यामसिंघझी नी गिया, पण गुलाबराय जोधपुर राजाजी ने कै, जैपुर राजाजी ने कैवायो जैपुरा राजाजी स्यामसिंघजी ने जैपुर में हवेली दे, गीजगढ़ रो डोढ़ लाख रो पट्टो स्यामसिंघजी ने झेलायो।

स्यामसिंघजी रा छोटा कंवर इन्द्रसिंघजी ने गुलाबराय घमा मान सं बुलाय पुसकर कनै थावलां रो पट्टो देवायो। उठे वां रा नाम सूं इन्द्रगढ़ थांवलो वाजियो।