जलम : 21 नवम्बर 1872,
गांव : देवपुरा, शाहपुरा राज्य में
पिता : ठा.कृष्णसिंह बारहठ
माता : बख्तावर कंवर
माताजी वांरे जलम रे एक महीना पछी देवलोक होय गिया हा जिण सुं वारां दादीसा श्रृंगार कंवरजी, जिका कवि राजा श्यामलदासजी रा बडी बैन हा, केसरी सिंह जी रो पालण-पोषण करयो हो।
केसरीसिंह जी रौ ब्यांव कोटा कविराज देवी दान जी री बैन माणिक कंवर सूं सन् 1890 में होयो।
पुत्र- कुं. प्रताप सिंह, कुं.रणजीत सिंह
पुत्रिया - चन्द्रमणि, सौभाग्यमणि
छोटा भाई - ठा.जोरावर सिंह, ठा.किशोर सिंह वृाहस्पत्य
व्यक्तित्व अर कृतित्व
राजस्थान रा केसरी सिंह बारहठ आपरे नाम रे तांई साम्प्रत केसरी इज हा। इण नांव रो महताऊ वरणाव इण भांत है-
केहर (सिंह) री कुल-कांण, भिडणों, सो किम भूलवे।
नाम धरम पहचाण कोइक जाणे कालिया।।
केसरी सिंह जी राज पूताणा री देसी रियासतां में सुतंतरता री जोत जगावण आला ऐडा लूंठा क्रान्तिकारी हा, जका पराधीन मायड भौम री आजादी रे जिग में आप खुद अर आपणे सगळे पिरवार रो सै कुछ होम दीनो।
भाई ठा. जोरावर सिंह बारहठ 23 दिसम्बर 1912 ई. में दिल्ली रे चांदणी चौक में वाइसरौय लार्ड हार्डिंग माथे बम फंैकिया हो, जिणरी गूंज सूं इंग्लैण्ड रो राज सिंहासण ई हिंडोले चढ्ग्यो हो, अमर शहीद कु. प्रताप सिंह बारहठ 24 मई 1918 में बरेली (उ.प्र.) री जैळ में अंगरेजां रो जुलम बरदास्त करता थका आपरो जीवण निसार दियो। वां खुद आपरे बेटे प्रताप सिंह रे साथै छोटे भाई जोरावर सिंह अर खुद रे जंवाई ईश्वरदान आशिया नै ई क्रान्तिकारी आन्दोलन में कूदण सारू अर्जुन लाल सेठी अर रास बिहारी बोस कनै भेज दिया।
इण वगत रा देस रा नामी क्रान्तिकारी रास बिहारी बोस, लाला हरदयाल श्यामजी कषण बर्मा, अर्जुन लाल सेठी, श्री गणेश शंकर विधार्थी अर राव गोपालसिंह आद रै सागै उणा रौ घणौ नैडो जुडाव हो।
केसरी सिंह जी देश री आजादी रे इण पख रै सागे ई संस्कृत, प्राकत, हिन्दी, गुजराती, मराठी, अर बंगला भाषावां रा लूठा विदवान, सांख्य योग आद दर्शनां अर काव्य शास्त्र रा ज्ञानी हा। वे शिक्षा री सही दीठ सूं देस ने जगावण आळा प्रणवीर पण हा।
हिंदुआ सूरज महाराणा मेवाड रो परताप आप रे पाण इज थिर रियो हो। 1903 ई. री 2 फरवरी ने लार्ड कर्जन कानी सूं सम्राट एडवर्ड रै पाट विराजण रे मौके दिल्ली में होवण आळे दरबार में पूगण खातर महाराणा फतेह सिंह जी व्हीर होय गिया हा। उण वगत बारहठ केसरी सिंह चेतावणी रा चूंगटया लिख र हलकारे रे हाथ महाराणा फतैह सिंह कने भेजिया। सरेरी स्टेशन माथे रेल में वां 13 सोरठो ने पढतां ई मेवाडी महाराणा से सूतोडो स्वाभिमान जागियो अर वे बिना दरबार में हाजरी दियां सीधा मेवाड पधार गिया। 2 फरवरी 1908 ई. री इण अणचिंत अर गळै नी ढलणवाळी घटणा रे असर री अजै तांई कूंत कौनी व्है सकी है। रजपूती मरजाद थिर राखण आळी एडी मिसाल,दूजी कठैई नी व्है सके है।
सिरे क्रान्तिकारी होवण रे सागे श्री बारहठ चावा'र ठावा सहित मनीषी पण हा। हजारी बाग सैट्रल जैळ मांयने आजीवण कैद रे बिचाळे आप सरावण जोग साहित रचियो जिणमें प्यारे पार्थ सारथी, ईश भक्ति, धनाख्षरी, नाम धरम री ओळखाण, आपरी बात, नीति रा दूहा अर गणेश शंकर विधार्थी, राव गोपाल सिंह खरवा अर कोटा महाराव उम्मेद सिंह जी अर चारण समाज रा महामना मदनमोहन मालवीय पूजण जोग मोती काल जी किनिया माथे बणायोडा मरसिया रे एक-एक आखर में ज्ञान रो सागर लखावे है।
चारण समाज में शिक्षा री जको अखुट जोत आपां रे अंतस में व्यापयोडी दीसे है, वा ठा. केसरी सिंह बारहठ रे इज जगायोडी है। ठावा-ठावा सैहरों-कस्बों में छात्रावासों री थरपना, ठकराई री ठौड पढाई रो पख झेलणो, पडदा'र त्याग जैडे कलंक सूं निकळंक वांरे पण इज होय सक्या हां।
सार ओ इज है के वे एकण सागैई राजस्थान रा रवीन्द्र नाथ अर अरविन्द पण हां। ऐडे जुग पुरूष ने बारम्बार वन्दन। |
ए ऐ ओ औ अं अ:
